«Մեդիա պաշտպան» նախաձեռնությունը հոկտեմբերի 7-ին հետևել է ռուսական 5 առաջատար լրատվամիջոցների հրապարակումներին՝ պարզելու, թե ինչպես է ռուսական մեդիան լուսաբանել Ադրբեջանի կողմից սանձազերծած գործողությունները։ Մասնավորապես, մշտադիտարկվել են «Լենտա ռու», «Գազետա ռու», «Ռիա Նովոստի», «Ռեգնում», և «ՏԱՍՍ» կայքերը։
«Լենտա ռու»-ն հրապարակվել է 24 հոդված, 5՝ ադրբեջանական կողմի հրապարակումներն են, 8՝ հայկական կողմինը, 11 տարբեր երկրների և կառույցների կոչեր, հայտարարություններ, ինչպես նաև՝ պետպաշոնյաների և մասնագետների մեկնաբանություններ։ 11 նյութից 8-ը՝ չեզոք, 3-ը՝ հայամետ, 0-ն՝ ադրբեջանամետ։
«Գազետա ռու»-ն հրապարակել է 38 հոդված, 8՝ ադրբեջանական կողմի հրապարակումներն են, 12՝ հայկական կողմինը, 18 տարբեր երկրների և կառույցների կոչեր, հայտարարություններ, ինչպես նաև՝ պետպաշոնյաների և մասնագետների մեկնաբանություններ։ 18 նյութերից 13-ը՝ չեզոք, 4-ը՝ հայամետ, 1-ը՝ ադրբեջանամետ։
«Ռիա Նովոստի»-ն հրապարակել է 62 հոդված, 19՝ ադրբեջանական կողմի հրապարակումներն են, 27՝ հայկական կողմինը, 16 տարբեր երկրների և կառույցների կոչեր, հայտարարություններ, ինչպես նաև պետպաշոնյաների և մասնագետների մեկնաբանություններ։ 16 նյութից 12-ը՝ չեզոք, 4-ը՝ հայամետ, 0-ն՝ ադրբեջանամետ։
«ՏԱՍՍ»-ը հրապարակել է 57 հոդված, 17՝ ադրբեջանական կողմի հրապարակումներն են, 24՝ հայկական կողմինը, 16 տարբեր երկրների և կառույցների կոչեր, հայտարարություններ, ինչպես նաև պետպաշոնյաների և մասնագետների մեկնաբանություններ: 16 նյութից 14-ը՝ չեզոք, 1-ը՝ հայամետ, 1-ը՝ ադրբեջանամետ։
«Ռեգնում»-ը հրապարակել է 45 հոդված, 10՝ ադրբեջանական կողմի հրապարակումներն են, 16՝ հայկական կողմինը, 19՝ տարբեր երկրների և կառույցների կոչեր, հայտարարություններ, ինչպես նաև պետպաշտոնյաների և մասնագետների մեկնաբանություններ։ 19 նյութերից 33-ը՝ չեզոք, 6-ը՝ հայամետ, 0-ն՝ ադրբեջանամետ։
Ռուսական մամուլում երեկվա դրությամբ դիտարկվել են ավելի շատ հայանպաստ հոդվածներ և կարծիքներ։ Ռուս և ռուսաստանաբնակ փորձագետները հիմնականում խոսել են Արցախյան խնդրի բանակցային ճանապարհով լուծման մասին։
Ռուսական մամուլում հայտնվել է հայ ֆուտբոլիստ Հենրիխ Մխիթարյանի հայտարարությունը, ըստ որի՝ ֆուտբոլիստը ՌԴ նախագահ Պուտինին, Ֆրանսիայի նախագահ Մակրոնին և ԱՄՆ նախագահ Թրամփին կոչ է արել դադարեցնել պատերազմը։ «Ադրբեջանցիները հարձակվում են խաղաղ բնակչության վրա։ Նրանց ճակատագիրը միշտ խեղված է լինելու»,- հավելել է Մխիթարյանը։
Ըստ մամուլի հրապարակումների՝ Եվրամիության արտաքին քաղաքականության և անվտանգության հարցերով գերագույն ներկայացուցիչ Ժոզեպ Բորելը հայտարարել է, որ Արցախից հայկական զորքերի դուրս գալու Ադրբեջանի պահանջած կոնկրետ ժամանակացույցն անիրագործելի է։
«ՏԱՍՍ» գործակալությունը ռեպորտաժ է պատրաստել, թե ինչպես են ապաստարաններում ապրում Գանձակի բնակիչները։ «ՏԱՍՍ» գործակալությունը գործել է միակողմանի։ Փաստացի, Ստեփանակերտը, Շուշին, Հադրութը և մի շարք այլ քաղաքներ ռմբակոծվում են ադրբեջանական զինուժի կողմից, ադրբեջանական կողմը հստակ և ծրագրված պայքար է սկսել խաղաղ բնակչության դեմ, իսկ «ՏԱՍՍ» գործակալության ռեպորտաժում վերը նշված քաղաքների մասին որևէ հիշատակում չկա։
