Վեհափառ Գարեգին Երկրորդի հայտարարության մեջ նշվում էր ՀՀ երկրորդ նախագահ Ռոբերտ Քոչարյանի խափանման միջոցը փոխելու մասին։ Այս հայտարարության հետ կապված մեկնաբանությունում վարչապետի մամուլի քարտուղար Մանե Գևորգյանն իր խոսքում հիշատակել է Սամվել Մայրապետյանին. «Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը մինչ այս եղել է Ռոբերտ Քոչարյանի հետ նույն` Մարտի 1-ի գործով անցնող, տարբեր հանցանքների, այդ թվում՝ առանձնապես խոշոր չափերով կաշառք տալուն և փողերի լվացմանն օժանդակելու մեջ մեղադրվող Սամվել Մայրապետյանի անձնական երաշխավորը։ Մայրապետյանը 2019-ի հունվարից բուժման պատրվակով մեկնել է երկրից և չնայած քննչական մարմնի պահանջին և ի հեճուկս Տեր Վահրամ քահանա Մելիքյանի երաշխավորությանը, չի վերադարձել Հայաստան։ ՀՀ կառավարությունը որևէ մեկնաբանություն չունի Վեհափառի ցանկությունների ու հույսերի վերաբերյալ, միևնույն ժամանակ ակնկալում ենք, որ Մայր Աթոռը կվերագնահատի Մայրապետյանի երաշխավորության պատմությունը և դրա հետևանքով առաջացած վիճակը»։
Գործադիր իշխանության ներկայացուցչի կողմից դատական իշխանության գործառույթներին միջամտելը կոպտորեն խախտում է ՀՀ Սահմանդրությամբ ամրագրված իշխանության ճյուղերի անակախության և տարանջատման սկզբունքը։
«Մեդիա պաշտպան» նախաձեռնությունը կոչ է անում Մանե Գևորգյանին մնալ իր պարտականությունների շրջանակներում և չմիջամտել դատական իշխանության գործերին։