«Մեդիա պաշտպան» նախաձեռնությունը հոկտեմբերի 13-ին հետևել է արտասահմանյան 5 առաջատար լրատվամիջոցների հրապարակումներին՝ պարզելու, թե ինչպես է արտասահմանյան մեդիան լուսաբանել Ադրբեջանի կողմից սանձազերծած գործողությունները։ Մասնավորապես, մշտադիտարկվել են «BBC», «CNN», «Reuters», «Associated Press» (AP) և «Deutsche Welle» (DW) լրատվական գործակալությունների կայքերը։
BBC լրատվական գործակալությունը նշված ժամանակահատվածում հրապարակել է 1 ծավալուն ռեպորտաժ` «Լեռնային Ղարաբաղ․ էթնիկ հայերը` կրակի տակ գտնվող կյանքի մասին» վերտառությամբ։ BBC-ի լրագրող Սթիվ Ռոզենբերգի հեղինակային ռեպորտաժը Արցախի բնակիչների շուրթերով պատմում է ադրբեջանական ագրեսիայի հետևանքների մասին։
CNN լրատվական գործակալությունը հոկտեմբերի 13-ի իր հրապարակումներում չի անդրադարձել Ղարաբաղյան հակամարտությանը։
Reuters լրատվական գործակալությունը նշված ժամանակահատվածում հրապարակել է 6 հոդված։ Հոդվածներից մեկը ծավալուն անդրադարձ է հակամարտության պատմությանը, ինչպես նաև հնարավոր ռիսկերին։
Associated Press լրատվական գործակալությունը նշված ժամանակահատվածում հրապարակել է 1 հոդված։ Գործակալությունն իր ծավալուն հոդվածում նշել է, որ չնայած մարդասիրական հրադադար հաստատելու բոլոր կոչերին` «հայ-ադրբեջանական բախումների արդյունքում զոհերի թիվն աճում է»։
Deutsche Welle լրատվական գործակալությունը Լեռնային Ղարաբաղի հակամարտությունն ակտիվ լուսաբանող լրատվամիջոցներից է, սակայն հոկտեմբերի 13-ի իր հրապարակումներում չի անդրադարձել թեմային։
