Հանրային հեռուստաընկերությունը երեկվա թողարկումներում տեղեկացրել էր, որ փոփոխություններ են կատարվել լրատվամիջոցների գործունեությանը վերաբերող դրույթներում, մասնավորապես, հաղորդումներն առանց պաշտոնական տեղեկության հրապարակելու դեպքում, լրատվամիջոցները պետք է հրապարակեն պարետատան տրամադրած հերքումը կամ պարզաբանումը այն ստանալուց հետո՝ երկու ժամվա ընթացքում։
Կորոնավիրուսի մասին օտարերկրյա ԶԼՄ-ներից արտատպած նյութերի վերնագրում պետք է նշվի նյութի սկզբնաղբյուրը։ Մինչդեռ այն մասին, որ ԵԱՀԿ մամուլի ազատության հարցերով ներկայացուցիչը մտահոգված է Հայաստանում մամուլի ազատության սահմանափակուներով ու այդ մասին հանդես է եկել հայտարարությամբ, որը տարածվեց մյուս բոլոր հեռուստաընկերություններով ու լրատվամիջոցներով, հանրայինը չներկայացրեց։ Հայտարարության մեջ ասվում էր, որ «Օրենքը չպետք է խոչընդոտի լրագրողների աշխատանքը և պանդեմիայի մասին հաղորդելու նրանց հնարավորությունը: Միայն իշխանությունների կողմից տրամադրված տեղեկատվության հրապարակումը չափազանց խիստ սահմանափակող միջոց է, որը սահմանափակում է լրատվամիջոցների ազատությունը և տեղեկատվության անհամաչափ մատչելիությունը»։
Ստացվում է, հարկատուների գումարներով գործող Հանրային հեռուստաընկերությունը լրատվությունն ամբողջական չի ներկայացնում ու ընտրում է՝ որ լուրը եթեր հեռարձակել, որը՝ ոչ՝ խաթարելով իրական պատկերը։ Ի դեպ, իշխանությունները սահմանափակումները սահմանելուց հետո հայտարարում էին, որ դրանք հանվելու են, մինչդեռ հակառակը՝ ազատականցման փոխարեն տուգանքները ավելացել են, իսկ փոփոխություններն աննշան են։