«Լրագրողներ առանց սահմանների» (Reporters sans frontières — Reporters Without Borders-RSF) կազմակերպությունն իր թվիթերյան էջում քննադատել է Հայաստանի կառավարության որոշումը՝ արտակարգ դրության ժամանակ տեղեկատվությունը սահմանափակելու մասին:
Մարտի 16-ին հրապարակված RSF-ի թվիթերյան գրառման մեջ ասված է.
«Հայաստանը սահմանել է արտակարգ դրություն եւ պարտադրում է մեդիային վկայակոչել միայն պաշտոնական աղբյուրները: Տեղեկատվության վերահսկողությունը չի օգնում պայքարել համաճարակի դեմ, այլ նպաստում է ասեկոսեների եւ վախի տարածմանը»:
Մեդիամաքսը նշում է, որ մարտի 18-ի դրությամբ RSF-ի պաշտոնական կայքում Հայաստանում սահմանված արտակարգ դրության մասին որեւէ հիշատակություն չկա:
Արտակարգ դրության մասին ՀՀ կառավարության որոշման մեջ, մասնավորապես, ասված է.
«Եթե անձիք եւ զանգվածային լրատվության միջոցները ինտերնետում, այդ թվում` սոցիալական ցանցերում կամ այլ ձեւով ցանկանում են տեղեկատվական նյութ տեղադրել կորոնավիրուսի վարակման առկա եւ նոր դեպքերի, անձանց առողջական վիճակի, վարակի աղբյուրների, մեկուսացվածների քանակի մասին, ապա պետք է օգտվեն բացառապես պարետատան կողմից տրամադրված պաշտոնական տեղեկատվությունից եւ հղում կատարեն դրան ու հնարավորինս վերարտադրեն այն:
Նրանց հրապարակումները չեն կարող հակասել պաշտոնական տեղեկատվությանը:
Նույնը նաեւ վերաբերում է այնպիսի տեղեկություններին, որոնք հանգեցնում են խուճապի կամ խուճապային իրադրություն ստեղծելու վտանգ են պարունակում:
Նման հրապարակումները ենթակա են անհապաղ վերացման այն կատարած անձանց կողմից»:
Սկզբնաղբյուրը՝ Mediamax.am