Այսօր վարչապետի մամուլի արդեն նախկին քարտուղար Վլադիմիր Կարապետյանը ֆեյսբուքյան էջում տեղեկացրեց, որ այլևս չի կատարում վարչապետի մամուլի քարտուղարի պարտականությունները։ «Վարչապետ Փաշինյանի գրասենյակում աշխատելու այս մեկ տարին գերազանց փորձ էր: Ինչպես խոստացել էի նշանակումից առաջ՝ գործս արել եմ հավեսով ու նվիրումով։ Շնորհակալ եմ»,- գրել է Վլադիմիր Կարապետյանը։
«Մեդիա Պաշտպան» նախաձենությունը կառավարության կայքից տեղեկացավ, որ Վլադիմիր Կարապետյանի ազատման մասին որոշումը դեռ երեկ է կայացվել, բայց միայն այսօր է հայտնի դարձել մամուլի ներկայացուցիչներին և հասարակությանը։ Ավելի՛ն, կառավարության կայքէջի համապատասխան դաշտում արդեն իսկ բացակայում է Կարապետյանի անունը։
Հավելյալ տեղեկատվության համար «Մեդիա Պաշտպան» նախաձեռնությունը փորձեց կապ հաստատել պրն․ Կարապետյանի հետ, սակայն նա մեր զանգերին այդպես էլ չպատասախանեց։
Համացանցում քննարկվում է Վլադիմիր Կարապետյանի ազատման մի քանի պատճառ։ Նշվում է, որ վարչապետը դժգոհ է եղել նրա աշխատանքից։ «Քաղաքացիական գիտակցություն» ՀԿ նախագահ Նարեկ Սամսոնյանը երեկ գրել էր․ «Կարապետյանը Պուտինին հարց տալու համար գաղտնի ակրեդիտացիա էր տվել Ռուսթավի 2 հեռուստաալիքի լրագրողին և որքան էլ զարմանալի է Փաշինյանը չի կարողացել Կրեմլում կռուտիտ անել թեման»:
Դիտարկվում է նաև այն տարբերակը, որ վարչապետը փորձում է ազատվել ՀԱԿ-ի նախկին կադրերից։ Politik.am կայքի խմբագիր Բորիս Մուրազին գրել է․ «Միայն Փաշինյանը կարող էր Վլադիմիր Կարապետյանին աշխատանքից ազատել Տեր-Պետրոսյանի ծննդյան օրը»։
Սիվիլնեթի լրագրող Թաթուլ Հակոբյանն էլ ափսոսանք է հայտնել՝ ֆեյսբուքյան էջում, մասնավորապես, գրելով․ «Եթե կարճ՝ապերախտ որոշում։ Նիկոլի հետ աշխատեց իր վրա վերցնելով շատ հարվածներ»։