2019թ-ի հոկտեմբերի 11-ից 20-ը «Մեդիա պաշտպան» նախաձեռնությունը հետևել է առցանց մամուլում ՀՀ նախագահ Արմեն Սարգսյանի անձին ու գործունեությանն առնչվող նյութերին։ Մշտադիտարկվել է ներհայաստանյան 35 առաջատար լրատվական կայք։
Նշված ժամանակահատվածում դիտարկվել է 490 հոդված, որոնցից 9-ը եղել է բացասական, 50-ը՝ դրական, 431-ը՝ չեզոք։
Նախագահ Արմեն Սարգսյանը լրատվական դաշտում կարողացել է վերականգնել իր դրական վարկանիշը։ Որպես դրական գնահատվել է Արմեն Սարգսյանի Երևանի մետրոպոլիտենով ուղևորությունը։ Մետրոպոլիտենի մամուլի խոսնակ Տաթև Խաչատրյանը տեսանյութ է հրապարակել։
Քիմ Քարդաշյանը Հայաստան այցի ժամանակ հանդիպում էր ունեցել նաև նախագահ Արմեն Սարգսյանի հետ։ Այցից հետո Քիմը կիսվել էր իր տպավորություններով և շնորհակալություն հայտնել Արմեն Սարգսյանին ընդունելության համար։
Հանրապետության նախագահ Արմեն Սարգսյանն ընդունել է «Բարեփոխելով աշխարհը» փառատոնի հիմնադիր, պրոդյուսեր, ռեժիսոր, «Associated Television International» ֆիլմարտադրող ընկերության ղեկավար Դեյվիդ ՄաքՔենզիին, փառատոնի համահիմնադիրների ու կազմակերպիչների հետ: Դեյվիդ ՄաքՔենզին փառատոնի հատուկ մարդասիրական մրցանակը (Humanitarian Award) շնորհել է նախագահ Արմեն Սարգսյանին՝ Հայաստանում իշխանության խաղաղ փոփոխություններին աջակցելու, ինչպես նաև մարդասիրական գործունեության և մարդու իրավունքների պաշտպանության գործում ունեցած ավանդի համար:
Գառնիկ Իսագուլյանը, անդրադառնալով Հայաստանի ներքին խնդիրներին, քննադատել է Արմեն Սարգսյանին և ասել է, որ Հայաստանում այս պահի քաոսային վիճակի համար նա է մեղավոր։ Ըստ նրա, Արմեն Սարգսյանը իրեն վերապահված լիազորությունները չի կարողանում կատարել։